କବିତା – ପାଉଁଶ ତଳର ନିଆଁ – ଅଧ୍ୟାପକ ନୃସିଂହାନନ୍ଦ ମହାପାତ୍ର

ଲେଖକ ପରିଚୟ

ସମ୍ପାଦକ - | ବ୍ଲଗ | ସଦ୍ୟ ପୋଷ୍ଟ

ବଣମଲ୍ଲୀର ମହକ ହେଉଛି ଓଡିଆ ସାହିତ୍ୟ ଓ ସଂସ୍କୃତିର ନିଆରା ସ୍ଵର ଯାହା ସମଗ୍ର ବିଶ୍ଵର ଓଡିଆ ଲେଖକ ଓ ପାଠକ ମାନଙ୍କୁ ଏକ ଭର୍ଚୁଆଲ ସମ୍ପ୍ରଦାୟରେ ଏକତ୍ରିତ କରିଥାଏ ।

ବହୁ ଦିନପରେ  ଆଜି କାହିଁ ଝୁରେ
 ଅମାନିଆ ଆଖି ଲୁହ
ମନ ଆକାଶରେ ନାଚି ଯାଉଛି ଯା’
ଚନ୍ଦ୍ରମା ତୁମ ମୁହଁ ।
ଲୁହଟୋପେ ପଡି ମାଟିରୁ ଫୁଟୁଛି
ମମତାର ନୀଳ କଇଁ
ତୋଳିବାକୁ ଗଲେ ଅଭିମାନେ ସିଏ
କରୁଅଛି ନାହିଁ ନାହିଁ ।
ଆଗୋ ନୀଳ କଇଁ କାହିଁ କର ନାହିଁ
ପଚାରିଲେ ବାର ଵାର
ଛଳ ଛଳ ତାର ଆଖିରୁ ଉଛୁଳୃ
ଶ୍ରାବଣର ଲୁହଧାର ।
କହିଲା ସରାଗେ ଜନମ ଜନମ
ତୁମପାଇଁ ଫୁଟୁଥିବି
ସକଳ କାମନା ତୁଟାଇ ପ୍ରିୟଗୋ
ଚରଣରେ ଲୋଟୁଥିବି ।
ପ୍ରେମ ସିନାଏକ ଅଜର ଅମର
ପାଉଁଶ ତଳର ନିଆଁ
ସେଇ ଭାବନାଟି ପୁଲକିତ କରେ
କାଉଁରୀ କାଠିର ଛୁଆଁ ।
ତୁମେ ନାହଁ ହେଲେ ପରାଣରେ ମୋର
ଆଙ୍କିଛି ନୀଳିମା ରେଖା 
ଗଗନେ ପବନେ ବନେ ଉପବନେ
ପାଉଥାଏ ତୁମ ଦେଖା ।
ଯେତେଥର ଭାବେ ତୁମକୁ ଭୁଲିବି
ଚିରିକି ପୁରୁଣା ଚିଠି
ସେ ଚିଠିରେ ଥିବା ନିଆଁର ଝୁଲରେ
ଜଳୁଛି ମୋହର ଛାତି ।
ପଳ ପଳ ଦୁଃଖ ପଲକ ପାତରେ
ପର କରି ଗଲ କାହିଁ 
ଭୁଲିବାକୁ ଭାବି ଏବେଵି ତୁମକୁ
ଜମା ଭୁଲି ପାରୁ ନାହିଁ ।
ତୁମରି ସ୍ମୃତିରେ ଏତେ ମିଠା ଅଛି
ବିରହରେ ଜଳେ ସିନା
ପାଣି ଓ ପବନ ହୁଏ ଆନମନା
ଖାସ୍ ତୁମରି ବିନା ।
ତୁମକୁ ଭାଳି ମୁଁ ଲାଜରେ ମରୁଛି
ନିତି ଦିନ ପ୍ରତିକ୍ଷଣେ
ତଥାପି ତୁମରି ପରିକା ଝିଅଟେ
ଦେଖୁ ନାହିଁ କେହି ଜଣେ  ।।

ନୃସିଂହାନନ୍ଦ ମହାପାତ୍ର, ଅଧ୍ୟାପକ,
ସରକାରୀ ଆଇଟିଆଇ, ଫୁଲବାଣୀ, କନ୍ଧମାଳ, ମୋ-୯୪୩୭୧୧୨୩୫୪


HTML tutorial

ବଣମଲ୍ଲୀର ମହକ ହେଉଛି ଓଡିଆ ସାହିତ୍ୟ ଓ ସଂସ୍କୃତିର ନିଆରା ସ୍ଵର ଯାହା ସମଗ୍ର ବିଶ୍ଵର ଓଡିଆ ଲେଖକ ଓ ପାଠକ ମାନଙ୍କୁ ଏକ ଭର୍ଚୁଆଲ ସମ୍ପ୍ରଦାୟରେ ଏକତ୍ରିତ କରିଥାଏ ।

ଆପଣଙ୍କ କମେଣ୍ଟ ଉତ୍ତର ପାଇବାକୁ ସବ୍ସକ୍ରାଇବ କରନ୍ତୁ
ମତେ ଜଣାନ୍ତୁ
guest
0 କମେଣ୍ଟ
ଇନଲାଇନ ଫିଡବ୍ୟାକ
ସମସ୍ତ କମେଣ୍ଟ ଦେଖନ୍ତୁ