କବିତା – ପ୍ରେମିକ ହେବା କଣ କମ୍ କଥା – ଶିବ ଚରଣ ମହାପାତ୍ର

ଲେଖକ ପରିଚୟ

ସମ୍ପାଦକ - | ବ୍ଲଗ | ସଦ୍ୟ ପୋଷ୍ଟ

ବଣମଲ୍ଲୀର ମହକ ହେଉଛି ଓଡିଆ ସାହିତ୍ୟ ଓ ସଂସ୍କୃତିର ନିଆରା ସ୍ଵର ଯାହା ସମଗ୍ର ବିଶ୍ଵର ଓଡିଆ ଲେଖକ ଓ ପାଠକ ମାନଙ୍କୁ ଏକ ଭର୍ଚୁଆଲ ସମ୍ପ୍ରଦାୟରେ ଏକତ୍ରିତ କରିଥାଏ ।

ପ୍ରେମ ଓଠରେ
ଶୋରିଷ ଫୁଲର ହସ ଆଙ୍କିବାକୁ
ପଥର ଛାତିରେ ସାଜିବାକୁୁ ହୁଏ ଫଗୁଣ ବରଣ..
ଅଭିମାନ ର କଟକଣା ଲଗାଇ
ରୋକିବାକୁ ହୁଏ
ସ୍ୱପ୍ନ ର ଆକାଶ ଛୁଆଁ ଉଡାଣ..
ମନ କୁ କାଠ କଣ୍ଢେଇ ପରି ନାଚିବାକୁ ହୁଏ
ପ୍ରେମ ର ମିଠା ମିଠା ହଣ୍ଟର ମାଡରେ..
ଭିଡ ଭିତରର କୋଳାହଳ ରାଗିଣୀ ଲାଗେ
ସତେ ଅବା
ଅନ୍ଧକାର ଗଳିରେ ଆଶରୀରୀ ନିର୍ଜନତା..
ତେବେ ତୁମେ କୁହ
ପ୍ରେମିକ ହେବା କଣ କମ୍ କଥା..??

କାମନା ର ଶିର ଛେଦି ବଞ୍ଚୁଥିବା ମନ
ଟାଣୁ ଥାଏ ସାରା ଦିନ
ଫାଳେ ଇଛା ର ତୋରଣ ଫାଳେ ଶୁଖିଲା ଜୀବନ..
ଦୀପ୍ତିମୟୀ ଅଦୃଶ୍ୟ ସତ୍ତା ଶିଉଳି ଲଗା ଗାଲିଚା
ବାରମ୍ବାର କରେ ମୋତେ ସ୍କନ୍ଧଚ୍ୟୁତ..
ଆଉ ମୁଁ..
କାମନା ର ବିନାଶ ରେ ଦୁଃଖ ର ବିନାଶ କହି
ଧାଉଁଥାଏ କାମନା ପଛରେ ପୁନର୍ବାର ..
ସଙ୍ଗ କରି
ମୃତବତ୍ ହୃଦୟର ବାସହୀନ ଆବିଳତା..
ତେବେ ତୁମେ କୁହ
ପ୍ରେମିକ ହେବା କଣ କମ୍ କଥା..??

ନା ବେଳ , ନା ଅବେଳ , ନା ସଞ୍ଜ , ନା ସକାଳ
ନା ବର୍ଷ , ନା ମାସ , ନା ଦୁଃଖ , ନା ହସ
ନା ଲୁହ , ନା କୋହ , ନା ମାୟା , ନା ମୋହ ସ~ବୁ..
ତୁମ ଚିନ୍ତନ ର ଓଜନ ବଢାଏ
ଭାରି ହୁଏ ମୋ ଅଧାଲେଖା ଚିଠି ର ସ୍ପନ୍ଦନ..
ଓଦା ସରସର ହୁଏ ଶବ୍ଦ ର ଛନ୍ଦହୀନ ବଉଳ ମାଳ..
ସେତେବେଳେ..
ଲେଖନୀ ବି ଅଡି କରି ବସେ ପ୍ରେମିକ ହେବାକୁ..
ହେଲେ ସେ କି ବୁଝିବ
ତା ହୃଦୟରୁ ଝରୁଥିବା ରୁଧିରାକ୍ତ ସ୍ୟାହି
ସାଦା କାଗଜ ଛାତିରେ
ତୋଳୁଥିଲା ନୀରବତା..
ତୁମେ କୁହ
ପ୍ରେମିକ ହେବା କଣ କମ୍ କଥା..??

ଶିବ ଚରଣ ମହାପାତ୍ର
ଚକ୍ରଧରପୁର, କେନ୍ଦୁଝର


HTML tutorial

ବଣମଲ୍ଲୀର ମହକ ହେଉଛି ଓଡିଆ ସାହିତ୍ୟ ଓ ସଂସ୍କୃତିର ନିଆରା ସ୍ଵର ଯାହା ସମଗ୍ର ବିଶ୍ଵର ଓଡିଆ ଲେଖକ ଓ ପାଠକ ମାନଙ୍କୁ ଏକ ଭର୍ଚୁଆଲ ସମ୍ପ୍ରଦାୟରେ ଏକତ୍ରିତ କରିଥାଏ ।

ଆପଣଙ୍କ କମେଣ୍ଟ ଉତ୍ତର ପାଇବାକୁ ସବ୍ସକ୍ରାଇବ କରନ୍ତୁ
ମତେ ଜଣାନ୍ତୁ
guest
0 କମେଣ୍ଟ
ଇନଲାଇନ ଫିଡବ୍ୟାକ
ସମସ୍ତ କମେଣ୍ଟ ଦେଖନ୍ତୁ