କବିତା – ତୁମେ ମୋ ପୁନେଇଁ ଚାନ୍ଦ – ସିଦ୍ଧେଶ୍ବର ତ୍ରିପାଠୀ

ତୁମେ ଗାଇଥିବା ପ୍ରୀତିବୋଳା ଗୀତ
ହୃଦୟର ସ୍ମୃତି ଦାଗ
ବେଦନା ଭରା କଣ୍ଠେ ମୁଁ ଗାଉଛି
ଜୀବନର ଅସ୍ତରାଗ ।

ନିଦାଘ ବର୍ଷା କାକରକୁ ଦେଖି
ମୋତେ ଲାଗେ ଭାରି ଭୟ
ଉଆଁସୀ କନିଆ ତୁମ କଥା ଭାବି
ଆଖିରୁ ସୁଖେନି ଲୁହ ।

ବିରହ ଭଟାରୁ ନିର୍ବାଣ ନାହିଁ
ଜୀବନେ ଶୁଖିଲା ପାଗ
ଅଗଣାରେ ମୋର କେବେ ପଡିବନି
ତୁମ ଅଳତାର ଦାଗ ।

ନିଶିରୁ ପ୍ରଭାତ ମୋ ଆଖିରେ ନାଚେ
ଜହ୍ନ ପରି ତୁମ ମୁହଁ
ଉଆଁସୀ କନିଆ ତୁମ କଥା ଭାବି
ଆଖିରୁ ସୁଖେନି ଲୁହ ।