କ୍ଷୁଦ୍ରଗଳ୍ପ – ଗୁମର – ମାନମୟୀ ରଥ

ଲେଖକ ପରିଚୟ

ମାନମୟୀ ରଥ
ପୁରୀ, ଓଡିଶା | +

ଅନ୍ୟ ଲେଖାଗୁଡ଼ିକ ପଢନ୍ତୁ

ଏହି ବିଷୟଟି 64 ଜଣ ପାଠକ ପଢି ସାରିଛନ୍ତି

ରାସ୍ତାରେ ମ୍ୟୁହମାନ ହୋଇ ପଡ଼ିଥିବା କୋଳଟେକୁ ପ୍ରଥମେ ଜରିଖୋଳ ଭାବି ଏଡେଇ ଯାଇଥିଲେ ଭଦ୍ରମହିଳା । କିଛି ପାହୁଣ୍ଡ ଗଲାପରେ କାହିଁକି କେଜାଣି ତାଙ୍କୁ ଲାଗିଲା ମାଗଣାରେ ମିଳୁଥିବା ଗୋଟିଏ ମୂଲ୍ୟବାନ ଦୋଳିକୁ ଏଡ଼େଇ ଗଲାଭଳି । ଅଗତ୍ୟା ସେ ଫେରିଲେ । ନଇଁ ପଡ଼ି କୋଳକୁ ତଳୁ ଉଠେଇ ଆଣନ୍ତେ ତ ଆର୍ତ୍ତନାଦ କଲା ସେ , “ଛୁଅଁନି ମତେ । ଭିନ୍ନ ଭିନ୍ନ ଶୁକ୍ରାଣୁରୁ ଜାତ ଭିନ୍ନ ଭିନ୍ନ ରୂପ ଧାରଣ କରୁଥିବା ଜରାୟୁ ସାଙ୍ଘାତିକ ରୋଗଗ୍ରସ୍ତ ହେଲାପରେ ତା’ ସହ ମୁଁ ମଧ୍ୟ ଅଲୋଡା ହୋଇଗଲି । ଏମିତିରେ ବି ଢେର ସାରା ଖୁସି ଧରି ଆସୁଥିବା କଅଁଳ ଲୁତୁପୁତିଆ ଶିଶୁକୁ କୋଉ ମୁଁ ଜାକି ପାରୁଥିଲି ଯେ ନିଜ ଭିତରେ !” ଥକି ଗଲା ଭଳି ଧକେଇ ଧକେଇ ସ୍ୱରରେ କହୁଥିଲା ସେ ।

“ମୁଁ ତ ବୁଝି ଯାଇଥିଲି ସେମାନେ ମୋର ନଥିଲେ ବୋଲି । ନିଜର ଗୋଟେ ହେଉ ବୋଲି ବିକଳ ହେଲାବେଳକୁ ଜରାୟୁ ଭିତରର ଦୁଃସାଧ୍ୟ ରୋଗ ମୋର ଇଚ୍ଛାକୁ ଧୂଳିସାତ କରି ଦେଇଥିଲା । ଜୀବ ଥିଲା ଯାଏଁ ଲାଳରେ ରକ୍ତରେ ତିଆରି ହୋଇଥିବା ମୁଲାୟମ ସ୍ବପ୍ନସବୁକୁ ଦୃଷ୍ଟିରେ ମାଖିରଖିବି ବୋଲି ପ୍ରାଣକୁ ଆଦରି ପଡ଼ିରହିଛି ଏଇଠି ।ବହୁତ ହୋଇଗଲା ଭଡ଼ା। ଅସମ୍ଭବ ସେଇଠି ଅସହାୟତାର ଜ୍ୱାଳା । ସ୍ବପ୍ନ ରହୁ ଲୋଡିବାପଣର ପ୍ରଖରତାରେ ।” କହିଲା ବେଳେ ସେ କ୍ଷତର ପାହାଡ଼ଟାଏ ମୁଣ୍ଡେଇ ଧରିଛି ଭଳି ଲାଗୁଥିଲା ଭଦ୍ରମହିଳାଙ୍କୁ । ବୋର୍ଡିଂ ସ୍କୁଲ , କ୍ରେଚ ଯୁଗରେ ଗଭୀର ମମତ୍ୱ ଏବଂ ଆବେଗରେ ଛଳଛଳେଇ ଯାଉଥିବା କୋଳର ଶୁଦ୍ଧତାକୁ ପରଖି ସାରିଲା ପରେ ସତସତିକା ଭଦ୍ରମହିଳା ଲୋଭେଇ ଯାଇଥିଲେ । ସେ ନିଜେ ଜଣେ କର୍ମଜୀବୀ ମାଆ । ଘରେ ମାଆ କୋଳ ପାଇଁ ଆଉଟୁପାଉଟୁ ଛଅ ମାସର ଛୁଆ । ଇଏ ତ ସୁଯୋଗ ମାନେ ସୁବର୍ଣ୍ଣ ସୁଯୋଗ । ଟିକେ ପ୍ୟାଚ ୱାର୍କ ଦରକାର ଏହି କୋଳ ପାଇଁ ଯାହା ତାଙ୍କର ବୁର୍ଜୁଆ ସ୍ୱାମୀ ନାମିଦାମୀ ନର୍ସିଂହୋମରେ କରିପାରିବେ । ଛିଡା ହୋଇଥିବା ଅବସ୍ଥାରୁ ଟିକେ ଝୁଙ୍କି ପଡ଼ି ବର୍ତ୍ତମାନ ସେ ଲୋଭ ଦେଖେଇଲେ କୋଳକୁ ।”ମୋସହ ଆସ । ଏ.ସି.ଠୁ ଓଭାନ୍ , ଗ୍ରାଇଣ୍ଡରଠାରୁ ରୋଟିମେକର ସବୁ ଅଛି ଘରେ । ବେବି ମୋର ଏକଦମ ସୁଧାର । ତୁମକୁ ପାଇଲେ ସେ ଖୁସି ହେବ । ମୁଁ ନିଶ୍ଚିନ୍ତ ହେଇଯିବି । ମେଡ଼ିସିନ ଦେଇ ଆମେ ତୁମକୁ ଫିଟ କରିଦେବୁ । ପୂରା ଯାନ୍ତ୍ରିକ ହୋଇଯାଇଥିବା କୋଳ ଆସ୍ତେ ପଚାରିଲା , ଛୁଆ ଭଳି ତା ବାପା ସୁଧାର ତ ? ପ୍ରକାଣ୍ଡ ଲାତଟେ ମାରି ଉଠି ଆସିଲେ ଭଦ୍ରମହିଳା । ସ୍ନେହୀ କୋଳଟେକୁ ଘରକୁ ନେବେ ସେ କେଉଁ ଗରଜରେ ??

ମାନମୟୀ ରଥ, ପୁରୀ, ଓଡିଶା

HTML tutorial

ଅଧିକ ନୂଆ ପୋଷ୍ଟ ଗୁଡିକୁ ପଢନ୍ତୁ

0 0 votes
Article Rating
Subscribe
Notify of
guest
2 Comments
Oldest
Newest Most Voted
Inline Feedbacks
View all comments
ରଙ୍ଗନାଥ ରଥ
Guest
ରଙ୍ଗନାଥ ରଥ
22 days ago

ଗଳ୍ପଟିର ଆକାର କ୍ଷୁଦ୍ର ହୋଇଥିଲେ ମଧ୍ୟ ଏଥିରେ ନିହିତ ଥିବା ଗୂଢ଼ ଦାର୍ଶନିକ ତତ୍ତ୍ଵ ଯୋଗୁଁ ଏହାକୁ ହୃଦ୍-ବୋଧ କରିବା ମୋଭଳି ଜଣେ ସାଧାରଣ ପାଠକ ନିମନ୍ତେ ଦୁରୂହ ବ୍ୟାପାର ମନେହେଲା।
ଗାଳ୍ପିକାଙ୍କୁ ଅନ୍ତରରୁ ସାଧୁବାଦ ଜଣାଉଛି।

ଲକ୍ଷ୍ମୀନାରାୟଣ ପଟ୍ଟନାୟକ
Guest
ଲକ୍ଷ୍ମୀନାରାୟଣ ପଟ୍ଟନାୟକ
21 days ago

ଖୁବ ସୁନ୍ଦର ଗଳ୍ପଟିଏ । ଗଭୀର ଜଳର ସାତ ତାଳ ପଙ୍କ ଭିତରେ ଥିବା ରହସ୍ୟକୁ ମୁଁ ଖୋଜୁଛି ସେତେବେଳୁ ।