ହେ ରାଧା ମାଧବ – ସଞ୍ଜୁକ୍ତା ରାଉତ

ଜୟପୁର, କୋରାପୁଟ, ଓଡିଶା | ସଦ୍ୟ ପୋଷ୍ଟ

ଦୋଳ ବିମାନରେ
ବୁଲୁଛ ତ ଘରେ ଘରେ ୲

ସବୁ ହୃଦୟରେ ,
ପ୍ରେମ ଭରିଦିଅ
କ୍ରୋଧ , ହିଂସା ଯାଉ ଦୂରେ ୲ ୲

ହୃଦୟଟା ହେଉ
ଦେବାଳୟ ସମ
ମନ ହେଉ ନିରିମଳ ୲

ସ୍ନେହ ପୀରତିର
ରଙ୍ଗରେ ରଙ୍ଗୀନ
ସବୁରି ଜୀବନ କର ୲ ୲

ନ ଲାଗୁ ଜୀବନ
ରଙ୍ଗହୀନ ସମ
ହେଉ ସଦା ମଧୁମୟ ୲

ହୋଲି ରଙ୍ଗ ଠାରୁ ,
ନିଅାରା ସେ ରଙ୍ଗ
ହୃଦ କରେ ଯେବେ ଜୟ ୲ ୲

ଆଜି ଏ ଦିନରେ
ହୋଲି ଅବସରେ
ଦେଇ ମୁଁ ପାରୁନି କିଛି ।

ରାଧା ନୁହେଁ,ହେଲେ
ରାଧାଙ୍କ ଛାଇ ମୁଁ
ରାଧା ପ୍ରେମେ ହଜିଅଛି ।।

ସାଧାରଣ ନେତ୍ରେ
ତୁମ ଦୁହିଁଙ୍କର
ପୀରତି ଥିଲା ପାର୍ଥିବ ।

ମୋ’ଆଖିରେ ତାହା
ମୈତ୍ରୀ ଆବାହକ
ଦିବ୍ୟ ଚେତନା, ଦୁର୍ଲଭ ୲ ୲

ହେ ରାଧା ମାଧବ
ସୁଶ୍ରେୟଃ ଯାଦବ
ପୁଣ୍ୟ ପର୍ବ ଅବସରେ ।

ଏକାନ୍ତ ମିନତୀ
ନିଷ୍କାମ ପୀରତି
ଭରିଦିଅ ସଂସାରରେ ।।