ସୁଟ୍ ଜାପାନୀ – ଶିବ ଚରଣ ମହାପାତ୍ର

ଲେଖକ ପରିଚୟ

+ ଏହି ଲେଖକଙ୍କର ଅନ୍ୟ ଲେଖା ପଢିବାକୁ [ଏଠାରେ କ୍ଲିକ କରନ୍ତୁ]

ପର ଘର ତୁଣ ଭାରି ସୁଆଦ ଲୋ
ନିଜ ଘରେ ପିତା ପାଣି
ପର ମାଇପ ଟା ଚହଟ ଚିକ୍କଣ
ନିଜ ଭାରିଜା ଟା କାଣି ..
ପର ପୁରୁଷ ଟା ରତିକ ରୋଶନ
ଘର ପତି ଜାଣେନାହିଁ
ପର ଚାଳେ ଝୁଲେ ଗୁଡ ମାଠିଆ କୁ
ତୁମେ କାଇଁ ହାଇଁ ପାଁଇ..
ନିଜ ପୁଅ ଭାରି ସୁଧାର ପିଲାଟା
ପର ପୁଅ ଅଝଟିଆ
ନିଜ ଝିଅ ଭାରି ସରଳ ସଂସ୍କାରି
ପର ଝିଅ ବାଡ ଡିଆଁ..
ସାହେବ ର ସ୍ତ୍ରୀ ଅନିନ୍ଦ୍ଯ ସୁନ୍ଦରୀ
ତାଙ୍କ ପିଲା ଦେବଦୂତ
ନିଜ ଘର ସ୍ତ୍ରୀ ଛୁଆ ପିଲା ସବୁ
ଲାଗନ୍ତି ବାବନା ଭୂତ..
ଧୋତି କୁରୁତା ରେ ଟୋକା ଲାଗେ ବୁଢା
ସୁଉଟୁ ସାର୍ଟ ଆଦର
ଶାଢୀ ପିନ୍ଧିଦେଲେ ଝାଳ ବହେ ବୋଲି
ଭାଉଜ ପିନ୍ଧେ ସାଲୁଆର..
ନିଜ ପରମ୍ପରା ହଡା ଗାଇ ଭାବି
ପାଦରେ ଆଡେଇ ଯାଅ
ପାଶ୍ଚାତ୍ୟ ସଂସ୍କୃତି ଅତର ମାଖିଛି
ଆଗେପଛେ ଘୁରୁଥାଅ..
ନିଜ ଘର ଭାଷା ଭାରି ଅଖାଡୁଅ
ବିଦେଶୀ ଭାଷା ଟା ଭଲ
ଘଣା ପେଡା ଯେତେ ଦେହକୁ କୁଣ୍ଡାଏ
ପସନ୍ଦ ଜାପାନ ତେଲ..
ଦୂର ପରବତ ଭାରି ସୁନ୍ଦର ତ
ଭିତରେ ଯନ୍ତ୍ରଣା ଭରା
ନିଜ ଚାଳ ଛାଡି ପର ଘରେ ଗଲେ
ଦେଖିବ ଦିନରେ ତାରା..
ବେଳ ଥାଉଁ କୁଳ ବାଇନ ସମ୍ଭାଳ
ଉଛୁର କରନା ବେଶି
ନିଜ ଜିନିଷ ଟା ଅସଲି ରେ ଧନ
ପରଖି ନେ ମାଞ୍ଜି ଘଷି…

×-×-×-×-×-×-×-×-×-×
ଶିବ ଚରଣ ମହାପାତ୍ର
ଚକ୍ରଧରପୁର : କେନ୍ଦୁଝର

Leave a Reply

Your email address will not be published. Required fields are marked *