ତୁଠ – ପ୍ରମୋଦ କୁମାର ପଣ୍ଡା

ଲେଖକ ପରିଚୟ

ପ୍ରମୋଦ କୁମାର ପଣ୍ଡା
ବାଘମାରୀ, ଖୋରଧା | ସଦ୍ୟ ପୋଷ୍ଟ

Read More

 ସୂରୁଜ ଯେ କାଳେ ମୁରୁଜ ବୁଣଇ
                ଚହଟଇ ସୁନା ରଙ୍ଗ
ନୀଳ ପରବତ ଉହାଡୁ ସହସା
                ଝରେ ଆଲୋକ ତରଙ୍ଗ
ନଭେ ନିରିଭୟେ ଉଡନ୍ତି ପକ୍ଷୀଏ
                ଶୁଭଇ କାକଳୀ ସ୍ୱନ
ନୀଳ ଜଳରାଶି ଛୁଏଁ ଧୀରେ ଆସି
                ଶିହରେ ତୋ ତନୁ ମନ
ରୂପସୀ ସରସୀ ଦିଅଇ ଆଉଁସି
                ତୋ ବୁକୁ ଉଠଇ ଥରି
ଊଷାମିଶା ବାତେ ତୋ ପାଷାଣଗାତ୍ରେ
                ଅୟୁତେ ରୋମାଂଚ ଭରି
ତୋ ମଥାରେ ଯୋଷା କରେପଦଘସା
                ଝୁଣ୍ଟିଆ ପାଉଁଜି ବାଜେ
ତା ପାଦ ଅଳତା କସେ ବଧୂ ବେଶେ
                ଆରକ୍ତ ତୋତନୁ ଲାଜେ
ଅଳସୀ କିଶୋରୀ ତନୁରେ ତୋହରି
                ଘସି ତା ଚରଣ ଧୁଏ
ତୋ ଦେହରେ ମସି ଯାଏ ସିନା ବସି
                 ତା ତନୁ ନିର୍ମଳ ହୁଏ
ତୁହି ଅଛୁ ସାକ୍ଷୀ କେତେ ବିଧୁମୁଖୀ
                ଧୋଇଛି ତା ନଗ୍ନ ଦେହ
ବାପଘର ତେଜି ଯାଇଛି ଯେକାଳେ
                ତୋ ପରେ ଝରିଛି ଲୁହ
କେତେ ପ୍ରୀତିମିଶା ମତୁଆଲା ସଞ୍ଜ
                ନବ ପୁଲକିତ ଊଷା
ଶତ ଇତିହାସ ମର୍ଦ୍ଦିତ ତୋ ଗାତ୍ର
                ସହସ୍ର କଳଙ୍କ ମିଶା
ସମୟ ଜୁଆର କ୍ରମ ନିରନ୍ତର
                ଋତୁଏ ଯାଆନ୍ତି ହଜି
ତୁ ତୂଠ ପଥର ସାକ୍ଷୀ ସବୁୁ ଥର
                ସରାଗେ ବିରାଗେ ଭିଜି
ପ୍ରମୋଦ କୁମାର ପଣ୍ଡା
ବାଘମାରୀ, ଖୋର୍ଦ୍ଧା

HTML tutorial
ଆପଣଙ୍କ କମେଣ୍ଟ ଉତ୍ତର ପାଇବାକୁ ସବ୍ସକ୍ରାଇବ କରନ୍ତୁ
ମତେ ଜଣାନ୍ତୁ
guest
0 କମେଣ୍ଟ
ଇନଲାଇନ ଫିଡବ୍ୟାକ
ସମସ୍ତ କମେଣ୍ଟ ଦେଖନ୍ତୁ