ପ୍ରେମ – ମୋ ଭାଷାରେ – ରାଜେଶ କୁମାର ମୁଣ୍ଡ

ଲେଖକ ପରିଚୟ

ରାଜେଶ କୁମାର ମୁଣ୍ଡ
ଧର୍ମଗଡ, କଳାହାଣ୍ଡି | ସଦ୍ୟ ପୋଷ୍ଟ

ଅନ୍ୟ ଲେଖାଗୁଡ଼ିକ ପଢନ୍ତୁ

ପ୍ରେମ ଏକ ପବିତ୍ର ଶବ୍ଦ, ଶାଶ୍ୱତ ଉଚ୍ଚାରଣ.. ଝରଝର ନିର୍ଝରିଣୀର ଝଙ୍କୁରିତ ଜଳ, ବୀଜଟେ ଗଜୁରିବା ବେଳେ ମାଟିର ଆବେଗ,ସଞ୍ଜ ନଇଁ ଯିବାପରେ, ସମଗ୍ର ଧରାକୁ କୋଳାଗ୍ରତ କରିବା ପାଇଁ ଅନ୍ଧାରର ଉତ୍କଣ୍ଠା, ଆକାଶରେ ତାରା, ଜହ୍ନ ଓ ମେଘ ସହ ସହବାସ ପାଇଁ ଆତୁରତା, ପୁଣି ପ୍ରାତଃ ପୃଥିବୀର ଛାତିକୁ ବିଦାରି, ଅନ୍ଧାରର ବୁକୁକୁ ଚିରି ବାଳାରୁଣର ଅଦମ୍ୟ ସାହସର ଉଦ୍ଦାମତା । ପ୍ରେମ… ମାତୃଗର୍ଭରୁ ସୃଷ୍ଟି ଏକ ଅନାହତ ଧ୍ୱନି, ଜୀବନର ପ୍ରାରମ୍ଭରୁ ଶେଷ ଯାଏଁ ସଂଲଗ୍ନିତ ମନ୍ତ୍ର, ବୟସର ବୃଦ୍ଧି ସହ ବୃଦ୍ଧି ହୁଏ ତା’ର ସାନ୍ଧ୍ରତା, ପବିତ୍ରତା; ଯିଏ ଶିଖେଇ ଦିଏ, ଦୁଃଖକୁ ସୁଖରେ ପରିଣତ କରିବା କଳା, ପାହାଡ଼ରେ ପଦ୍ମ ଫୁଟେଇବା ପାଇଁ, ଅଦୃଶ୍ୟ ମନ୍ଦିର ଚୂଡ଼ାରେ ନେତଟେ ବାନ୍ଧିବା ପାଇଁ ଅବା କାଳବୈଶାଖୀରେ ଦୀପଟେ ଜାଳିବା ପାଇଁ କୌଶଳ ଓ ସାହସ । ପ୍ରେମ ସଙ୍ଗୀତର ଏକ ମୂର୍ଚ୍ଛନା, ଯା’ ଦ୍ୱାରା ପାଷାଣି ଅହଲ୍ୟା ଜୀବନ୍ତ ହେଇପାରେ, ଦସ୍ୟୁ ରତ୍ନାକର ବାଲ୍ମୀକି ହେଇପାରେ, ବସ୍ତ୍ର ହରଣରେ ଦ୍ରୌପଦୀର ଲଜ୍ଜା ନିବାରଣ ହେଇପାରେ, ପ୍ରେମ ଏକ ସ୍ପନ୍ଦନ, ଯାହା କେବଳ ଅନୁଭବ ହୁଏ, ପ୍ରକାଶ କରିହୁଏନା ।


ରାଜେଶ କୁମାର ମୁଣ୍ଡ


HTML tutorial
ଆପଣଙ୍କ କମେଣ୍ଟ ଉତ୍ତର ପାଇବାକୁ ସବ୍ସକ୍ରାଇବ କରନ୍ତୁ
ମତେ ଜଣାନ୍ତୁ
guest
0 କମେଣ୍ଟ
ଇନଲାଇନ ଫିଡବ୍ୟାକ
ସମସ୍ତ କମେଣ୍ଟ ଦେଖନ୍ତୁ