କେବେ ତୁମେ – ପ୍ରକାଶ କୁମାର ଚାନ୍ଦ

ଲେଖକ ପରିଚୟ

ପ୍ରକାଶ କୁମାର ଚାନ୍ଦ
ଜୟପୁର ଶାସନ, ପିପିଲି, ପୁରୀ | ସଦ୍ୟ ପୋଷ୍ଟ

ଅନ୍ୟ ଲେଖାଗୁଡ଼ିକ ପଢନ୍ତୁ

ପ୍ରକାଶ କୁମାର ଚାନ୍ଦ
ଜଯପୁର ଶାସନ, ପିପିଲି, ପୁରୀ

କେବେ ତୁମେ ଲାଗ ମିଠା ମଳୟ ତ
କେବେ ଚନ୍ଦନର ବାସ
କେବେ ତୁମେ ଲାଗ କୁଆଁରୀ ସଞ୍ଜରେ
ରଙ୍ଗଣୀ ଫୁଲର ହସ ॥

କେବେ ତୁମେ ଲାଗ ପୂନେଇଁ ରାତିରେ
ଚାନ୍ଦର ଚାନ୍ଦିନୀ ଛିଟା
କେବେ ପୁଣି ତୁମେ ଲାଜକୁଳି ଲତା
କେବେ ମହୁ ଠାରୁ ମିଠା ॥

କେବେ ତୁମେ ଲାଗ ସପନ ଦ୍ଵୀପର
ତୁମେ ମୋ ସାଧବବୋହୂ
କେବେ ତୁମେ ଲାଗ ଫଗୁଣରେ ପୁଣି
କୋଈଲିର ମିଠା କୁହୁ ॥

କେବେ ତୁମେ ଲାଗ ଆକାଶର ମେଘ
କେବେ ବିଜୁଳିର କନ୍ୟା
କେବେ ତୁମେ ଲାଗ ପାହାଡି ଝରଣା
କେବେ ତ ପ୍ରୀତିର ବନ୍ୟା ॥

ଦୂର ଆକାଶର ଦୂର ଜହ୍ନ ତୁମେ
ସୁଦୂର ତୁମର ଗାଆଁ
ଲବଙ୍ଗ ଦ୍ଵୀପର ଲାବଣ୍ୟବତୀ ଗୋ
ରୂପ ତୁମ ମନଛୁଆଁ ॥

କେବେ ତୁମେ ଲାଗ ଶରତ ହାତରେ
କାଶତଣ୍ଡୀ ଫୁଲ ଗୋରୀ
କେବେ ତୁମେ ଲାଗ ଧାରା ଶିରାବଣେ
ବୈତରଣୀ ନଦୀ ପରି ॥

କେବେ ତୁମେ ଲାଗ ଆଷାଢ ଆକାଶେ
କଳା ବଉଦର ଛାଇ
କେବେ ତୁମେ ଆସ ବେଙ୍ଗୁଲୀ କଣ୍ଠରେ
ବରଷା ଜଳଦ ନେଇ ॥

କେବେ ତୁମେ ପୁଣି ପହିଲି ବରଷା
ଭିଜା ଭିଜା ଗନ୍ଧ ମାଟି
କେବେ ତୁମେ ପୁଣି ପଦୁଅଁ ପତରେ
ଚୋରା ଚଇତିର ଚିଠି ॥

ତୁମ ହସ ବେଶ ତୁମ ରୂପ ରଙ୍ଗ
କିଏ ହେବ ତୁମ ତୁଲ
କେବେ ସକାଳର ପାହାନ୍ତି କାକର
ଭୋଦୁଅର ଜହ୍ନିଫୁଲ ॥


HTML tutorial
ଆପଣଙ୍କ କମେଣ୍ଟ ଉତ୍ତର ପାଇବାକୁ ସବ୍ସକ୍ରାଇବ କରନ୍ତୁ
ମତେ ଜଣାନ୍ତୁ
guest
0 କମେଣ୍ଟ
ଇନଲାଇନ ଫିଡବ୍ୟାକ
ସମସ୍ତ କମେଣ୍ଟ ଦେଖନ୍ତୁ