କବିତା – କରିବନି ଅଭିମାନ – ସରିତା ମହାନ୍ତି

ଲେଖକ ପରିଚୟ

ସରିତା ମହାନ୍ତି
ବାସୁଦେବପୁର, ବାଲିଆପାଳ, ବାଲେଶ୍ୱର | ସଦ୍ୟ ପୋଷ୍ଟ

Read More

ଅଳପ ଦିନର ସଳପ  କାହାଣୀ
      ଅନ୍ତ ତାର ନ ହୋଇଲା
ସୁଖର ଦୁଃଖର ସେ ବାର୍ତ୍ତା ଆଳାପ
       ସମାପ୍ତ କିଏ କରିଲା ।
ସମ୍ପର୍କର ଯେଉଁ ସେତୁ ବାନ୍ଧି ଥିଲ
      ଛିନ୍ନ କଲ ଚିର ଦିନ
ଛାଡ଼ି ଦେଇ ଗଲ ସ୍ନେହ ପ୍ରେମ ପୁଣି
      ମିଠା ମିଠା କିଛି ଚିହ୍ନ ।
ତୁମରି ବାସରେ ମହକିବା ପାଇଁ
     ଆଶାର ବସା ବାନ୍ଧିଲି
ଆଶା ମୋ ତୁଟିଲା ବସା ମୋ ଭାଙ୍ଗିଲା
      ସ୍ଥାନ ଚ୍ୟୁତ ମୁଁ ହୋଇଲି ।
ଜୀବନର ମୋହ ଛିନ୍ନ କରି ଦେଇ
    ସଂସାରୁ ବିଦାୟ ନେଲ
ବୃକ୍ଷ ତ ରୋପିଲ ଫଳ ବି ଫଳିଲା
     ସ୍ଵାଦ ତାର ନ ଚାଖିଲ ।
ସଂସାର କର୍ତ୍ତବ୍ୟ ଯା ପରେ ଲଦିଲ
     ଲାଗେ ତାକୁ ଅସମ୍ଭାଳ
ପରୋକ୍ଷରେ ଅବା ରହିଥାଇ ପୁଣି
      ଦାୟିତ୍ୱ ଆସି ସମ୍ଭାଳ ।
ତୁମ ସ୍ଵପ୍ନ ରାଜି ମୋ ହାତେ ସମର୍ପି
      ସ୍ଵପ୍ନ ଅଧୁରା ରଖିଲ
ସବୁ ଥାଇ ଆଜି ଲାଗେ ଏକା ଏକା
      ଏମିତି କାହିଁ ରୁଷିଲ ।
ପୂର୍ଣ୍ଣ ପରିବାର କ୍ଷୁଣ୍ଣ ତ ହୋଇଲା
     ଅଶୁଭ କରି ରଖିଲ
ଯାହା ପାଇଁ ଦିନେ ହେଉଥିଲି ଶୁଭ
      ସାଥେ ସବୁ ନେଇଗଲ ।
ବିଭାଘର ହେଉ ଅବା ବ୍ରତଘର
    ନ ଲୋଡ଼ିବେ ଦିନେ କେହି
ହାତେ ଶଙ୍ଖା ନାହିଁ ନୁହେଁ ସୀମନ୍ତିନୀ
      ରହିଛି ଅଲୋଡା ହୋଇ ।
କେମିତି ନୀରବ ଏହା ଦେଖିଅଛ
     ବସି ଭାବୁଅଛି ମୁହିଁ
ଆର ଜନମକୁ କଥା ଦିଅ ସାଥୀ
    ଏମିତି କରିବ ନାହିଁ ।
କଥା ଦିଆ ନିଆ ଏମିତି ହୋଇବ
     କରିବନି ଅଭିମାନ
ମୋ ଶଂଖା ସିନ୍ଦୂର ମୋ ସହିତ ପୁଣି
    ଯାଉଥିବ ଶମଶାନ ।
ସରିତା ମହାନ୍ତି, ଶିକ୍ଷୟିତ୍ରୀ
ବାଲିଆପାଳ, ବାଲେଶ୍ବର, ମୋ-୮୦୯୩୫୯୦୦୮୬

HTML tutorial
ଆପଣଙ୍କ କମେଣ୍ଟ ଉତ୍ତର ପାଇବାକୁ ସବ୍ସକ୍ରାଇବ କରନ୍ତୁ
ମତେ ଜଣାନ୍ତୁ
guest
0 କମେଣ୍ଟ
ଇନଲାଇନ ଫିଡବ୍ୟାକ
ସମସ୍ତ କମେଣ୍ଟ ଦେଖନ୍ତୁ