ସାମାଜିକ ମୂଲ୍ୟବୋଧ ପ୍ରତିଷ୍ଠା ପାଇଁ ସାହିତ୍ୟ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ । ମାନବିକ ଭାବନା, ମୂଲ୍ୟବୋଧ ଏବଂ ପରିଚୟର ଅନୁସନ୍ଧାନରେ ସାହିତ୍ୟ ଏକ ଶକ୍ତିଶାଳୀ ସାଧନ । ସଂସ୍କୃତି, ପରମ୍ପରା ଓ ଐତିହ୍ୟର ପରିଚୟ, ସଂରକ୍ଷଣ ଓ ବିଶ୍ଳେଷଣ ସାହିତ୍ୟ ଦ୍ଵାରା ହିଁ ସମ୍ଭବ । ସାମାଜିକ ପୃଷ୍ଠଭୂମିରେ ସୃଜନଶୀଳ ଅଭିଜ୍ଞତା ହିଁ ସାହିତ୍ୟରେ ପ୍ରତିବିମ୍ବିତ ହୋଇଥାଏ । ସାହିତ୍ୟର ସୃଜନଶୀଳ ଆଲେଖ୍ୟ ପିଣ୍ଡରେ ପ୍ରାଣ ସଂଚାର କରିଥାଏ । ଅନ୍ଧକାରରୁ ଆଲୋକ ଆଡକୁ ବାଟ କଢାଇ ନେବାରେ ସହାୟକ ହୁଏ । ସମାଲୋଚକର ଚିନ୍ତାଧାରାକୁ ପରିବ୍ୟାପ୍ତ କରେ । ମାନବିକ ଅନୁଭୂତିର ଅନୁସନ୍ଧାନରେ ମାର୍ଗ ଦର୍ଶକ ସାଜିଥାଏ । ମନୁଷ୍ୟର ଜଟିଳ ଚିନ୍ତାଧାରାକୁ ସହଜ ସରଳ କରିବାରେ ସହାୟକ ହୁଏ । ସାହିତ୍ୟର ଆଦର ବଢିଲେ ଏକ ସୁସ୍ଥ ରାଷ୍ଟ୍ର ଗଠନ ସମ୍ଭବ ହୁଏ । ସାହିତ୍ୟ ହିଁ ଗୋଟିଏ ଜାତିର ପରିଚୟ ।
