ବେଶୀ କିଛି ଚାହେଁନା

ବେଶୀ କିଛି ଚାହେଁନା ଏ କୁସୁମରୁ

ଚାହେଁ ଟିକେ ପୁଲକ ।

ସେ ପୁଲକେ ଖେଳିଯିବ ଦୁନିଆରେ

ହସ ଖୁସି ଅନେକ ।।୧।।

ବେଶୀ କିଛି ଚାହେଁନା ଏ ପ୍ରଦୀପରୁ

ଚାହେଁ ଟିକେ ଆଲୋକ ।

ସେ ଅଲୋକେ ଲିଭିଜିବ କାଳରାତି

ଅନ୍ଧାରର ମୁଲକ ।।୨।।

ବେଶୀ କିଛି ଚାହେଁନା ଏ ଗଛ ଠାରୁ

ଚାହେଁ ଛାଇ ଟିକକ ।

ସେ ଛାଇରେ ଦୂର ହେବ ଖରା ତାତି

ବସିଯିବ ପଥିକ ।।୩।।

ବେଶୀ କିଛି ଚାହେଁନା ମୋ ହୃଦୟରୁ

ଚାହେଁ ଟିକେ ଚମକ ।

ସେ ଚମକେ ପାଲଟିବ ପ୍ରତି ପ୍ରାଣ

ସାହସର ପ୍ରତୀକ ।।୪।।

ବେଶୀ କିଛି ଚାହେଁନା ଏ ମାଟିଠାରୁ

ଚାହେଁ ପ୍ରେମ ଏତକ ।

ସେ ପ୍ରେମରେ ରହିବନି ରାଗ ଋଷା

ଅଶାନ୍ତିର ଧମକ ।।୫।।

ବେଶୀ କିଛି ଚାହେଁନା ଏ ପବନରୁ

ଚାହେଁ ହେବି ଗାୟକ ।

ସେ ସ୍ୱରରେ ଫେରିଯିବ କେତେ ସ୍ମୃତି

ଭିଜିଯିବ ପଲକ ।।୬।।

ବେଶୀ କିଛି ଚାହେଁନା ଏ ମଣିଷଠୁ

ଚାହେଁ ଟିକେ ବିବେକ ।

ଅଜ୍ଞାନକୁ ଜୟ କରି ସାଜିବ ସେ

ବିଜୟର ଘୋଟକ ।।୭।।

ରୁଦ୍ରରୂପା ବ୍ରହ୍ମା, ଦଶମ ଶ୍ରେଣୀ

ଚିକିଟୀ ଗଡ଼, ଗଞ୍ଜାମ